Articles by "MICHEZO"
Showing posts with label MICHEZO. Show all posts

Kajunason at 0

Nchi waandaji wa Mashindano ya Kombe la Mataifa Afrika mwaka 2027 (AFCON 2027) ambazo ni Tanzania, Kenya na Uganda zimesaini hati ya makubaliano ya pamoja inayojulikana kama CAF Joint Resolution – TotalEnergies AFCON PAMOJA 2027, kwa lengo la kuimarisha ushirikiano katika maandalizi ya mashindano hayo makubwa barani Afrika.

Utiaji saini wa makubaliano hayo umefanyika Mei 11, 2026 na kushuhudiwa na Rais wa Shirikisho la Mpira wa Miguu Afrika (CAF), Patrice Motsepe, ambaye amepongeza hatua hiyo kuwa muhimu katika kuhakikisha maandalizi yanaenda kwa ufanisi na mshikamano miongoni mwa nchi hizo tatu.

 Tanzania iliwakilishwa katika hafla hiyo na Waziri wa Habari, Utamaduni, Sanaa na Michezo, Paul Makonda pamoja na viongozi wa Shirikisho la Mpira wa Miguu Tanzania (TFF) wakiongozwa na Rais wa TFF, Wallace Karia.

Makubaliano hayo yanatarajiwa kusaidia uratibu wa maandalizi ya miundombinu, usafiri, usalama na masuala mengine muhimu kuelekea AFCON 2027, huku yakionesha dhamira ya Tanzania, Kenya na Uganda kushirikiana kwa karibu kuhakikisha mashindano hayo yanafanikiwa kwa viwango vya kimataifa.

Continue reading

Kajunason at 0

Na Mwandishi Wetu, Dar es Salaam

Benki ya Absa Tanzania kwa kushirikiana na The Runners Club, imezindua rasmi mbio za Absa Dar City Marathon 2026 zinazotarajiwa kufanyika Mei 17 mwaka huu jijini Dar es Salaam, huku zaidi ya washiriki 5,000 kutoka ndani na nje ya nchi wakitarajiwa kushiriki.

Tukio hilo linalozidi kujizolea umaarufu kila mwaka, linalenga kuhamasisha mazoezi ya mwili, kukuza mshikamano wa kijamii pamoja na kuendeleza mtindo wa maisha yenye afya miongoni mwa Watanzania.

Kwa mujibu wa waandaaji, mashindano ya mwaka huu yatakuwa na makundi matatu ya mbio ambayo ni kilomita 21.1 (Nusu Marathon), kilomita 10 na kilomita 5, yakitoa fursa kwa washiriki wa rika na viwango tofauti kushiriki.

Usajili wa kushiriki mbio hizo tayari umefunguliwa kupitia majukwaa rasmi, ambapo wakimbiaji wa kada zote, kuanzia wanariadha wakongwe hadi wapenda mazoezi na washiriki wa burudani, wamehimizwa kujitokeza kwa wingi kushiriki tukio hilo.

Akizungumza wakati wa uzinduzi huo, Mkurugenzi wa Masoko na Mahusiano wa Benki ya Absa Tanzania, Bw. Aron Luhanga, alisema mbio hizo ni zaidi ya mashindano ya riadha, bali ni jukwaa muhimu la kuimarisha afya na ustawi wa jamii.

“Katika Absa, tunaamini katika kuleta athari chanya katika jamii tunazozihudumia. Absa Dar City Marathon siyo tu mbio, bali ni jukwaa linalokuza afya, umoja na ustawi wa jamii,” alisema Luhanga.

Aliongeza kuwa benki hiyo inajivunia kushirikiana na The Runners Club katika kuandaa tukio hilo na kuhimiza Watanzania wengi zaidi kushiriki katika mazoezi ya mwili.

Kwa upande wake, Mratibu wa mbio hizo na Makamu wa Rais wa The Runners Club, Godphrey Mindu, alisema marathon hiyo inaonesha ukuaji wa kasi wa utamaduni wa kukimbia nchini.

“Tumeshuhudia jamii zikikusanyika kupitia mazoezi ya viungo, na tukio hili ni sherehe ya mshikamano huo. Tunatarajia kuwapokea wakimbiaji wa viwango vyote na kuwapatia uzoefu bora siku ya mashindano,” alisema Mindu.

Naye Katibu Mkuu wa Chama cha Riadha Mkoa wa Dar es Salaam, Felix Donald, alisema mbio hizo zina mchango mkubwa katika kukuza vipaji vya wanariadha chipukizi pamoja na kuimarisha nidhamu na afya kwa jamii.

“Matukio kama haya ni msingi wa kukuza riadha nchini. Tunayaunga mkono kwa sababu yanasaidia kujenga kizazi kipya cha wanamichezo,” alisema Donald.

Wawakilishi kutoka vilabu mbalimbali vya kukimbia walisisitiza kuwa tukio hilo limekuwa kiunganishi muhimu cha jamii. Johnson Mbunda “Balozi” kutoka Goba Roads Runners alisema marathon hiyo inawaunganisha wakimbiaji kutoka maeneo mbalimbali na kuwajengea urafiki wa kudumu.

Kwa upande wake, mwanachama wa Kigamboni Runners alisema tukio hilo limekuwa sehemu ya mkusanyiko wa kila mwaka unaowapa fursa washiriki kuungana na marafiki, familia pamoja na kukutana na watu wapya huku wakifurahia mandhari ya jiji la Dar es Salaam.

Uzinduzi huo ulihudhuriwa na wanachama wa vilabu mbalimbali vya kukimbia ikiwemo Tabata Runners, TOT Runners, Absa Running Club, Salasala Runners na Kigamboni Runners, pamoja na wadhamini wa tukio hilo.

Ushiriki wao umeendelea kuonesha kukua kwa kasi kwa utamaduni wa kukimbia nchini na mshikamano mkubwa wa jamii katika kuunga mkono jitihada za kukuza afya kupitia michezo.
Continue reading

Kajunason at 0

Na Mwandishi Wetu

Mwanariadha nyota wa Tanzania, Alphonce Simbu, ameendelea kuandika historia baada ya kutwaa ushindi mkubwa katika mbio maarufu za Boston Marathon 2026 zilizofanyika nchini Marekani, akionyesha ubora mkubwa mbele ya wakimbiaji bora duniani.

Simbu alimaliza mbio hizo za kilomita 42.195 kwa muda wa saa 2:03, akionesha kasi ya juu na uthabiti mkubwa tangu mwanzo hadi mwisho wa mashindano hayo yaliyovuta hisia za mashabiki wa riadha duniani kote.

Ushindi huo umeifanya Tanzania kuendelea kung’ara katika ramani ya michezo ya kimataifa, huku Simbu akionekana kuwa mmoja wa wakimbiaji hatari zaidi duniani kwa sasa.

Kilichowavutia wengi ni namna mwanariadha huyo alivyoimarisha rekodi yake ukilinganisha na mwaka uliopita, ambapo alitumia saa 2:05:04, jambo linaloonyesha maandalizi makubwa na nidhamu ya hali ya juu aliyonayo.

Katika mbio hizo zilizoshirikisha maelfu ya washiriki kutoka mataifa mbalimbali, Simbu alionekana mwenye kujiamini tangu mwanzo, akibaki kwenye kundi la mbele kabla ya kuongeza kasi katika hatua za mwisho na kuondoka na ushindi ulioshangiliwa na mashabiki wengi.

Baadhi ya wachambuzi wa michezo wameeleza kuwa mafanikio hayo ni ishara kuwa Tanzania bado ina hazina kubwa ya vipaji vya riadha vinavyoweza kutikisa dunia.

Mashabiki nchini Tanzania wamefurika mitandaoni kumpongeza Simbu, wakimtaja kuwa balozi mkubwa wa taifa anayelitangaza jina la nchi kupitia michezo.

Boston Marathon ni moja ya mashindano makubwa na yenye heshima duniani, hivyo ushindi wa Simbu unaongeza hadhi yake binafsi pamoja na heshima ya Tanzania kimataifa.

Kwa ushindi huo, Simbu ameendelea kuthibitisha kuwa kazi, nidhamu na kujituma vinaweza kuipeleka Tanzania kileleni mwa dunia ya michezo.

Continue reading

Kajunason at 0
Mashindano ya mchezo wa chess kwa watoto, Tanzanite Junior Chess Championship, yamefanyika jijini Dar es Salaam, yakileta pamoja washiriki kutoka shule mbalimbali nchini katika tukio lililojaa ushindani mkali, furaha na kujifunza.

Akizungumza wakati wa mashindano hayo, Mkurugenzi na Mwanzilishi wa Tanzanite Legacy Chess Club, Bi. Hellen Ulaya, aliwashukuru wazazi na walezi kwa mchango wao mkubwa wa kuwahamasisha watoto kushiriki. Alisisitiza kuwa ushiriki wa wazazi ni msingi muhimu katika kukuza vipaji na maendeleo ya watoto.
Bi. Ulaya alieleza kuwa mchezo wa chess ni nyenzo muhimu katika kukuza uwezo wa watoto kufikiri kwa kina, kufanya maamuzi sahihi pamoja na kujenga nidhamu na umakini, hali inayochangia pia mafanikio yao darasani na katika maisha ya kila siku.

Alifafanua kuwa lengo la mashindano hayo ni kuibua na kukuza vipaji vya watoto katika chess, kujenga kizazi chenye fikra makini na kuandaa mabingwa watakaoweza kulipeperusha bendera ya Tanzania kimataifa. Aidha, mashindano hayo yanalenga kuhamasisha ujifunzaji kupitia michezo huku yakijenga urafiki, ushirikiano na ushindani wa afya miongoni mwa watoto.
Kwa upande wa haki za watoto, Bi Ulaya alisisitiza kuwa kila mtoto anapaswa kupata fursa ya kushiriki katika michezo ya maendeleo ya akili bila kujali hali ya kifedha, akitoa wito kwa wadau kushirikiana kueneza mchezo wa chess mashuleni na katika jamii.

Mashindano ya Tanzanite Junior Chess Championship yameendelea kuwa chachu ya maendeleo kwa watoto wengi, yakitarajiwa kufanyika kila mwaka ili kutoa fursa kwa vipaji vipya kuibuka na kuimarika zaidi katika mchezo huo.
Continue reading

Kajunason at 0

Dar es Salaam — Kampuni ya michezo ya kubashiri ya PigaBet imetangaza rasmi kuingia mkataba wa udhamini na klabu ya Fountain Gate FC wenye thamani ya Shilingi bilioni 1, hatua inayotarajiwa kuongeza nguvu katika maendeleo ya soka nchini Tanzania.


Ushirikiano huo umetangazwa jijini Dar es Salaam, ukiwa ni sehemu ya mkakati wa PigaBet kuendeleza michezo kama chachu ya mshikamano wa jamii, ukuaji wa uchumi na kuinua hadhi ya taifa kupitia soka.

Hatua hiyo pia inaenda sambamba na mwanzo wa enzi mpya kwa Fountain Gate FC, ambayo sasa imehamishia makazi yake jijini Arusha, eneo linalozidi kujijenga kama kitovu cha michezo nchini kuelekea michuano ya Africa Cup of Nations 2027.
Akizungumza wakati wa uzinduzi huo, Meneja wa Masoko wa PigaBet, Arthur Kazola, alisema kampuni hiyo inaamini nguvu ya soka katika kuunganisha jamii na kuhamasisha vijana.

“Ushirikiano wetu na Fountain Gate FC si udhamini wa kawaida, bali ni uwekezaji katika mustakabali wa mpira wa miguu na kuinua hadhi ya Arusha kama jiji la michezo,” alisema Kazola.

Aliongeza kuwa Tanzania inaendelea kujijengea heshima barani Afrika katika soka, hivyo ni muhimu kwa sekta binafsi kuunga mkono juhudi hizo kwa vitendo.

Kwa upande wake, Rais wa klabu hiyo, Japhet Makau, alisema ujio wa PigaBet ni hatua kubwa si kwa klabu pekee bali kwa maendeleo ya soka la Tanzania kwa ujumla.

“Uwekezaji huu unaonesha wazi kuwa soka limekuwa chanzo cha ajira na fursa kwa vijana wetu. Tunakaribisha wadau wengine kuja kuunga mkono juhudi hizi,” alisema Makau.

Kwa mujibu wa makubaliano hayo, PigaBet itashiriki katika kusaidia maendeleo ya klabu ndani na nje ya uwanja, ikiwa ni pamoja na kuimarisha uhusiano na mashabiki na wadau wa soka.
Ushirikiano huo utaanza kuonekana rasmi Aprili 9, 2026, ambapo Fountain Gate FC itakuwa mwenyeji wa Simba SC katika Uwanja wa Sheikh Amri Abeid Stadium, katika mchezo wa Ligi Kuu Tanzania Bara unaotarajiwa kuvuta hisia za mashabiki wengi.

Kwa ujumla, hatua hii inaonekana kuwa kichocheo kipya cha maendeleo ya soka nchini, huku Arusha ikiendelea kujipambanua kama jiji muhimu katika ramani ya michezo Tanzania.

Continue reading

Kajunason at 0

Zurich — Shirikisho la Soka Duniani, FIFA, limetangaza rasmi makundi ya michuano ya FIFA World Cup 2026, huku timu kubwa zikitarajiwa kukutana mapema katika hatua ya makundi.

Katika upangaji huo, Kundi C linaonekana kuwa moja ya makundi magumu likizikutanisha Brazil, Morocco, Haiti na Scotland, huku Kundi F likiwa na ushindani mkali kati ya Uholanzi, Japan, Sweden na Tunisia.

Kwa upande mwingine, mabingwa wa zamani Argentina wamepangwa Kundi J pamoja na Algeria, Austria na Jordan, wakati Ufaransa wakiwa Kundi I wakisindikizwa na Senegal, Iraq na Norway.

Kundi K nalo limevuta hisia baada ya kuzikutanisha Ureno, DR Congo, Uzbekistan na Colombia, wakati England wao wako Kundi L pamoja na Croatia, Ghana na Panama.

Barani Afrika, timu kadhaa zimepata nafasi ya kushiriki, zikiwemo Morocco, Tunisia, Senegal, Algeria, Ghana, Ivory Coast, pamoja na DR Congo, hatua inayoonesha kuongezeka kwa uwakilishi wa bara hilo katika michuano hiyo mikubwa duniani.

Mashindano hayo yanatarajiwa kuwa na ushindani mkubwa kutokana na kuongezeka kwa idadi ya timu zinazoshiriki, huku yakihusisha mataifa mbalimbali yenye historia kubwa ya soka.

Kombe la Dunia 2026 linatarajiwa kuvutia mashabiki mamilioni duniani kote, huku timu zikianza maandalizi ya mwisho kuelekea michuano hiyo itakayokuwa ya kipekee katika historia ya soka duniani.

Continue reading

Kajunason at 0
Guadalajara, Mexico — Timu ya Taifa ya Jamhuri ya Kidemokrasia ya Kongo (DRC) imeandika historia mpya kwa kufuzu Fainali za Kombe la Dunia kwa mara ya pili tangu mwaka 1974, kufuatia ushindi mwembamba wa bao 1-0 dhidi ya Jamaica katika mchezo wa mchujo wa mabara uliopigwa Uwanja wa Guadalajara, Mexico.

Bao pekee la ushindi lilifungwa na beki wa klabu ya Burnley ya England, Axel Tuanzebe, katika dakika ya 100 ya muda wa nyongeza, akitumia vema mpira uliotokana na kona iliyopigwa na Brian Cipenga na kugonga mabeki wa Jamaica kabla ya kumkuta akiwa katika nafasi nzuri.

Kabla ya mchezo huo, Tuanzebe alinukuliwa akisema kuwa ulikuwa ni mchezo mkubwa zaidi katika maisha yake ya soka, na hatimaye akathibitisha hilo kwa kuiandikia DRC historia mpya. Mchezaji huyo aliyezaliwa Bunia, eneo lililoathiriwa na migogoro mashariki mwa DRC, sasa amekuwa shujaa wa taifa hilo.

Katika mchezo huo uliokuwa wa ushindani mkubwa, mshambuliaji wa DRC, Cedric Bakambu, alifunga mabao mawili ambayo yote yalikataliwa kutokana na kuotea, hali iliyoonyesha ugumu wa pambano hilo lililolazimika kuamuliwa kwa dakika 30 za nyongeza.

Bao la ushindi lilizua mjadala baada ya waamuzi wa video (VAR) kuchunguza uwezekano wa mpira kugusa mkono wa Tuanzebe, lakini baada ya uchunguzi ilibainika kuwa halikuwa kosa, hivyo bao hilo likathibitishwa.

Kwa upande wa Jamaica, ndoto yao ya kufuzu Kombe la Dunia kwa mara ya pili tangu mwaka 1998 ilizimika baada ya kushindwa kutumia vyema nafasi walizopata katika mchezo huo.

Kwa ushindi huo, DRC sasa inakuwa miongoni mwa timu 10 za Afrika zitakazoshiriki Kombe la Dunia, na imepangwa katika Kundi K pamoja na mataifa ya Ureno, Colombia na Uzbekistan.

Ushindi huo umeibua shangwe kubwa nchini DRC, huku mashabiki wakisherehekea kurejea kwa taifa hilo katika jukwaa la dunia baada ya kusubiri kwa muda mrefu zaidi ya nusu karne.

Continue reading

Kajunason at 0

Kigali, Rwanda — Waamuzi wa mpira wa miguu kutoka Tanzania wenye beji za Shirikisho la Soka Duniani (FIFA) wameendelea kuipeperusha vyema bendera ya nchi katika mashindano ya FIFA Series 2026 yaliyofanyika Kigali, Rwanda, baada ya kuteuliwa kusimamia michezo ya kimataifa.

Waamuzi hao ni Ahmed Arajiga aliyekuwa mwamuzi wa kati, akisaidiwa na Mohamed Mkono na Respicus Dismas kama waamuzi wasaidizi, huku Nasir Salum akihudumu kama mwamuzi wa akiba. Timu hiyo ya waamuzi ilikuwa miongoni mwa waliochezesha mchezo kati ya Kenya na Grenada katika mashindano hayo.

 Mashindano ya FIFA Series 2026 kwa upande wa Kituo ‘A’ yalizikutanisha timu za taifa za Rwanda, Kenya, Grenada na Estonia, yakifanyika katika Uwanja wa Amahoro, jijini Kigali. Ushiriki wa waamuzi hao unathibitisha kiwango chao cha juu na imani waliyopewa na FIFA kusimamia michezo ya kimataifa.

Kwa mujibu wa matokeo ya mashindano hayo, wenyeji Rwanda waliibuka mabingwa wa Kituo ‘A’, wakifuatiwa na Estonia katika nafasi ya pili, huku Kenya wakishika nafasi ya tatu.

Waamuzi hao wanatarajiwa kurejea nchini leo, huku uzoefu walioupata katika mashindano hayo ukitarajiwa kuleta mchango chanya katika kuboresha viwango vya uamuzi ndani ya ligi za ndani na mashindano mengine ya soka nchini Tanzania.
Continue reading

Kajunason at 0

Na Mwandishi Wetu.

Katibu Mkuu wa Shirikisho la Soka Barani Afrika (CAF), Véron Mosengo-Omba, ametangaza kujiuzulu wadhifa wake baada ya zaidi ya miaka 30 ya utumishi katika soka la kimataifa.

Katika taarifa rasmi iliyotolewa jijini Cairo Machi 29, 2026, Mosengo-Omba amesema amefikia uamuzi huo ili kujikita katika miradi binafsi baada ya kujitolea kwa muda mrefu kukuza soka kama chombo cha kuunganisha watu, kutoa elimu na kuleta matumaini.

Amesema kuwa sasa anaondoka akiwa na amani ya moyo baada ya kuondoa tuhuma zilizokuwa zikimkabili, akibainisha kuwa anaiacha CAF ikiwa imara zaidi na yenye mafanikio makubwa kuliko ilivyokuwa awali.

Mosengo-Omba pia alimshukuru Rais wa CAF, Patrice Motsepe, pamoja na timu yake na wadau wote wa soka barani Afrika kwa ushirikiano wao uliochangia mafanikio ya maendeleo ya mchezo huo.

Amehitimisha kwa kueleza matumaini yake kuwa mafanikio yaliyopatikana ndani ya CAF yataendelea kudumu na kuimarika zaidi katika siku zijazo.

Continue reading

Kajunason at 0

Moshi ilichangamka kwa mara nyingine tena huku maelfu ya wakimbiaji, mashabiki, na watazamaji wakikusanyika kwa toleo la mwaka 2026 la Kilimanjaro Marathon. Kilichoanza zaidi ya miongo miwili iliyopita kama mbio, kimekua na kuwa moja ya majukwaa yenye nguvu zaidi kitaifa nchini Tanzania, yakileta pamoja michezo, utalii, utamaduni, na jamii kwa namna ya kipekee.

Mbio za mwaka huu zilivutia ushiriki mkubwa kutoka kote Tanzania na duniani kwa ujumla, na kuimarisha nafasi yake kama tukio muhimu la utalii wa michezo. Kuanzia wanariadha wa kiwango cha juu hadi wakimbiaji wa mara ya kwanza, tukio hili liliunda uzoefu wa pamoja uliovuka mstari wa mwisho wa mashindano. Haikuwa tu kuhusu ushindani, bali pia ushiriki, muunganiko, na fahari ya taifa.

Kiini cha mafanikio haya ya muda mrefu ni Tanzania Breweries Public Limited Company kupitia chapa yake kuu ya Kilimanjaro Lager, ambayo imekuwa ikiunga mkono mbio hizi kwa miaka mingi. Ushirikiano huu umechukua nafasi kubwa katika kuunda tukio hili kuwa jukwaa linalotoa thamani ya kijamii na kiuchumi.

Mbio hizi zinaendelea kuleta faida halisi kwa uchumi wa eneo husika. Hoteli zilijaa wageni, huduma za usafiri ziliongezeka, na wafanyabiashara wadogo walipata ongezeko la biashara kutokana na wageni waliokuja Moshi. Kwa biashara nyingi ndogo, wiki ya marathon ni mojawapo ya vipindi muhimu zaidi kwa mwaka. Faida hii inaonesha mchango wa tukio hili katika kusaidia maisha ya watu na kuimarisha uchumi wa ndani.
Zaidi ya shughuli za kiuchumi, marathon hii inaongeza mwonekano wa Tanzania kimataifa. Washiriki wa kimataifa na vyombo vya habari vinaendelea kuiweka Tanzania kama kivutio kinachotoa si tu uzuri wa asili bali pia uzoefu wa kiwango cha kimataifa uliopangwa vizuri. Mkoa wa Kilimanjaro hasa unafaidika na mwonekano huu, ukithibitisha nafasi yake kama kitovu cha utalii na burudani za kipekee.

Kampeni ya mwaka huu, “The Best of Us - Vyakwetu Vizuri,” iliongeza maana ya kina kwa tukio hili. Ikitokana na misemo, methali, na lugha ya kila siku ya Watanzania, kampeni hii ilisherehekea utambulisho, uthabiti, na maadili kwa pamoja. Iliunganisha chachu ya mbio na maisha halisi ya Watanzania, na kufanya marathon hii kuwa ya kibinafsi na ya kitaifa kwa wakati mmoja.

Afya na ustawi pia vinaendelea kuwa sehemu muhimu ya faida ya marathon hii. Kwa miaka mingi, tukio hili limechangia kujenga utamaduni wa kukimbia na kuishi maisha yenye afya nchini. Watu wengi zaidi wanashiriki katika shughuli za mazoezi, na taasisi mbalimbali zinaanzisha majukwaa yanayohamasisha harakati na ustawi wa mwili. Marathon imekuwa mfano wa kile ambacho juhudi endelevu za afya ya jamii zinaweza kufanikisha nchini Tanzania.

Burudani haikuishia kwenye mbio pekee. Kili Dome kwa mara nyingine ilileta pamoja michezo, muziki, sherehe, na kuunda mazingira yenye hamasa ambapo washiriki na watazamaji waliweza kuungana na kujiburudisha. Mchanganyiko huu wa michezo na maisha ya kijamii unaakisi nafasi pana ya marathon katika kuunda uzoefu wa pamoja.

Akizungumza baada ya tukio, Mkurugenzi Mtendaji Michelle Kilpin alieleza ukuaji na umuhimu unaoendelea wa marathon hii kama jukwaa la kitaifa.

“Marathon ya Kilimanjaro inaendelea kuwaleta watu pamoja kutoka asili mbalimbali kwa namna inayoakisi maana halisi ya Tanzania. Inaunga mkono utalii, inakuza afya, na inajenga mahusiano yenye maana katika jamii. Tunajivunia kuona jinsi tukio hili linavyoendelea kukua na kutoa thamani zaidi ya mbio zenyewe.”

Kadri toleo la mwaka 2026 linavyohitimishwa, Kilimanjaro Marathon inabaki kuwa zaidi ya tukio la kila mwaka la michezo. Ni jukwaa linalochochea shughuli za kiuchumi, linaimarisha mshikamano wa jamii, linahamasisha maisha yenye afya, na linaonesha Tanzania kwa dunia.

Kupitia uungwaji mkono wake unaoendelea, Tanzania Breweries Plc kupitia Kilimanjaro Lager inaendeleza dhamira yake ya kusaidia mipango inayowaunganisha watu na kuchangia maendeleo ya muda mrefu ya taifa. Mbio zinaweza kuishia kwenye mstari wa mwisho, lakini faida yake inaendelea kwa muda mrefu zaidi.

Continue reading

Kajunason at 0

Na Mwandishi Wetu.

Dar es Salaam — Bodi ya Ligi Kuu Tanzania (TPLB) imetoa adhabu mbalimbali kwa klabu na waamuzi kufuatia matukio ya kinidhamu yaliyojitokeza katika michezo ya Ligi Kuu ya NBC, ikiwemo kuifungia mchezaji wa Young Africans, Djigui Diarra, na kuipiga faini klabu ya Simba SC.

Kwa mujibu wa taarifa rasmi iliyotolewa na TPLB, Diarra amefungiwa mechi tatu pamoja na kutozwa faini ya Sh milioni 2 baada ya kumshambulia mwamuzi kufuatia mchezo kati ya Mtibwa Sugar na Young Africans uliomalizika kwa sare ya 1-1 katika Uwanja wa Jamhuri, Dodoma.

Aidha, mchezaji huyo pia ametozwa faini nyingine ya Sh milioni 2 kwa kosa la kuonesha ishara isiyo ya kiungwana kwa mwamuzi baada ya kumalizika kwa mchezo huo.

Katika hatua nyingine, klabu ya Simba SC imetozwa faini ya Sh milioni 10 baada ya mashabiki wake kuwarushia waamuzi chupa za maji walipokuwa wakitoka uwanjani kufuatia mchezo dhidi ya Pamba Jiji FC uliomalizika kwa sare ya 1-1. Tukio hilo limetajwa kuwa ni la kujirudia ndani ya kipindi kifupi.

Kwa upande wa klabu ya TRA United, nayo imetozwa faini ya Sh laki tano baada ya wachezaji wake kuonyeshwa kadi zaidi ya tano katika mchezo mmoja dhidi ya Young Africans, hali inayokiuka kanuni za nidhamu za ligi.

Sambamba na adhabu hizo, TPLB pia imewachukulia hatua baadhi ya waamuzi wa mechi husika. Mwamuzi wa kati, Gilbert Mrina, ameshushwa daraja kwa kushindwa kuchukua hatua stahiki kwa kosa la kinidhamu lililofanywa na mchezaji Diarra, huku mwamuzi msaidizi Abdulaziz Ally akifungiwa mechi tano kwa kushindwa kutafsiri vyema sheria ya mpira wa miguu katika tukio la kuotea.

TPLB imesisitiza kuwa hatua hizo zimechukuliwa kwa mujibu wa kanuni za Ligi Kuu ili kuhakikisha nidhamu, haki na uwazi vinaendelea kudumishwa katika mashindano hayo.

Continue reading

Kajunason at 0


Na Mwandishi Wetu, Dar es Salaam.

Klabu ya Simba SC imefanikiwa kumbakisha kiungo wake mahiri, Elie Mpanzu, baada ya kusaini mkataba mpya wa miaka miwili kuendelea kuitumikia timu hiyo.

Hatua hiyo imepokelewa kwa furaha kubwa na mashabiki wa klabu hiyo, wakieleza kuwa kuendelea kubaki kwa nyota huyo wa kimataifa kutoka Jamhuri ya Kidemokrasia ya Congo ni faraja kubwa kuelekea misimu ijayo.

Wadau wa soka nchini pia wamempongeza Rais wa klabu hiyo, Mohammed Dewji, kwa juhudi zake katika kuhakikisha mchezaji huyo muhimu anaendelea kubaki ndani ya kikosi hicho.

Mpanzu amekuwa miongoni mwa wachezaji tegemeo ndani ya Simba SC, akionesha kiwango cha juu katika safu ya kiungo na kuchangia mafanikio ya timu hiyo katika mashindano ya ndani na kimataifa.

Uongozi wa Simba umeeleza kuwa kuendelea kumbakisha mchezaji huyo ni sehemu ya mkakati wa kuijenga timu imara itakayoweza kushindana katika ngazi ya juu zaidi, ikiwemo mashindano ya kimataifa barani Afrika.

Kwa upande wao, mashabiki wameonesha matumaini kuwa uwepo wa Mpanzu utaongeza nguvu katika kikosi hicho na kusaidia timu kufikia malengo yake ya kutwaa mataji makubwa msimu ujao.

Kuongezwa kwa mkataba huo ni ishara ya dhamira ya Simba SC kuendelea kuwekeza kwa wachezaji bora na kudumisha ushindani katika soka la Tanzania na Afrika kwa ujumla.

Continue reading

Kajunason at 0
Nairobi, Kenya: Rais wa Kenya, William Ruto, amesema serikali yake imejipanga kwa dhati kukuza vipaji vya vijana na kuendeleza sekta ya michezo kupitia uwekezaji mkubwa katika miundombinu ya kisasa ya michezo nchini humo.

Akizungumza kuhusu mkakati huo, Rais Ruto amesema serikali inawekeza katika miradi mikubwa ikiwemo ujenzi wa Talanta Sports Complex, ambao umebuniwa kusaidia kutambua, kukuza na kuinua vipaji vya vijana katika michezo mbalimbali.
Amesema kupitia uwekezaji huo, Kenya inalenga kujiimarisha si tu kama taifa lenye vipaji vingi vya michezo, bali pia kuwa kitovu cha ubora wa michezo katika ukanda wa Afrika Mashariki.

Rais Ruto amesisitiza kuwa juhudi hizo hazitalenga eneo moja pekee, bali zitasambazwa nchi nzima ili kuhakikisha kila mkoa unapata fursa na miundombinu ya kuzalisha wanamichezo bora watakaoleta fahari ya taifa.
Katika hatua nyingine, serikali imeanza rasmi ujenzi wa Uwanja wa Busia wenye thamani ya Shilingi za Kenya milioni 900. Uwanja huo utakuwa na uwezo wa kuchukua mashabiki 10,000 na utajengwa kwa viwango vya Shirikisho la Kimataifa la Soka (FIFA).

Mradi huo unatarajiwa kuimarisha michezo katika eneo la Busia na kutoa fursa zaidi kwa vijana kushiriki na kuonyesha vipaji vyao katika ngazi za kitaifa na kimataifa.

Hatua hiyo inaonesha dhamira ya serikali ya Kenya katika kutumia michezo kama nyenzo ya maendeleo ya kijamii na kiuchumi, pamoja na kuimarisha mshikamano wa kitaifa kupitia mafanikio ya wanamichezo wake. 
Continue reading

Kajunason at 0
Afrika: Shirikisho la Soka Barani Afrika, Confederation of African Football, limetangaza rasmi kuwa Morocco national football team ndio mabingwa wa michuano ya Mataifa ya Afrika (AFCON) 2025 kufuatia kubatilishwa kwa matokeo ya awali ya fainali dhidi ya Senegal national football team.

Awali, Senegal walikuwa wametwaa ubingwa huo kwa ushindi wa bao 1-0 dhidi ya Morocco katika mchezo wa fainali uliochezwa Januari 18, lakini mchezo huo ulitawaliwa na sintofahamu baada ya wachezaji wa Senegal kugoma kuendelea na mchezo kufuatia penalti iliyotolewa kwa Morocco dakika za nyongeza huku matokeo yakiwa 0-0.

Baada ya kusimama kwa takribani dakika 17, mchezo uliendelea ambapo Brahim Diaz alikosa penalti hiyo kabla ya Pape Gueye kufunga bao la ushindi katika muda wa nyongeza.

Hata hivyo, baada ya rufaa iliyowasilishwa na Shirikisho la Soka la Morocco (FRMF), Kamati ya Rufaa ya CAF imeamua kubatilisha matokeo hayo na kuitangaza Senegal kuwa imepoteza mchezo huo kwa mujibu wa kanuni za mashindano.

Kwa mujibu wa CAF, Senegal walikiuka kifungu cha 82 cha kanuni za AFCON kinachokataza timu kugoma kucheza au kuondoka uwanjani bila idhini ya mwamuzi. Hivyo, kwa mujibu wa kifungu cha 84, Senegal imepewa adhabu ya kupoteza mchezo huo kwa mabao 3-0.

Katika taarifa yake, FRMF imesema rufaa yao haikulenga kupinga uwezo wa timu uwanjani bali kuhakikisha sheria na kanuni za mashindano zinazingatiwa.

“Tunasisitiza umuhimu wa kuheshimu kanuni, uwazi wa mashindano na uthabiti wa soka la Afrika,” ilieleza sehemu ya taarifa hiyo.

Hadi sasa, Shirikisho la Soka la Senegal halijatoa tamko rasmi kuhusu uamuzi huo, ingawa wachezaji wao walionekana kusherehekea ubingwa huo kupitia mitandao ya kijamii baada ya mchezo wa fainali.

Wachambuzi wa soka wanasema licha ya uamuzi huo wa CAF, kumbukumbu ya kilichotokea uwanjani na hisia za mashabiki haziwezi kufutika kirahisi, hasa baada ya Senegal kuonekana kunyanyua kombe hilo na kusherehekea ushindi huo.

Uamuzi huo umeibua mjadala mpana miongoni mwa wadau wa soka barani Afrika kuhusu umuhimu wa kuheshimu sheria za mashindano dhidi ya matokeo ya uwanjani.
Continue reading

Kajunason at 0
Na Oscar Assenga, TANGA

KAMATI ya Siasa ya Chama cha Mapinduzi (CCM) Mkoa wa Tanga imeagiza kusimamishwa kazi Meneja wa Uwanja wa Mkwakwani Akida Machai kutokana na mapungufu mbalimbali yaliyobainika wakati wa ziara ya kamati hiyo kwa ajili ya kujionekana maendeleo yake.

Akizungumza kuhusu maamuzi hayo Mwenyekiti wa CCM Mkoa wa Tanga Rajab Abdurhaman ambapo alisema kwamba ukiangalia mapato yanayopatikana na gharama ambazo zinatumika zikitolewa sawasawa na CCM hakuna chochote kinachopatikana lakini maji yanalipwa na CCM, Umeme unalipwa na CCM.

Alisema wanafanya hivyo kuhakikisha wananchi waendelee kupata burudani ya michezo sasa wanapotoa fedha na kuona mambo bado hawaendi kama wanavyotarajia ni jambo ambalo limekuwa likiwaumiza.

“Mimi Binafsi nilitoa milioni 50 inawezekana fedha hamtafiti nyie ndio maana hamuoni uchungu wake mimi natayetafutaa fedha kwa wadau anawawaomba anajua uchungu wake lakini wao kwa sababu hawajui uchungu wake na walimuweka yeye kama meneja wakiamini angeweza kutusaidia kuhakikisha uwanja huo muda wote unaweza kuwa bora unatumika”Alisema

“Lakini ukija wakati wote uwanja umekuwa kama Mbuga za Wanyama haiwezekani sio sawa mpaka leo viti vimeletwa havijafungwa na mmeviacha mpaka vimeota majani”Alisema
Aidha alisema kwamba wao wamekaa kama viongozi waliochaguliwa ili uwanja uweze kufikia vigezo lakini mpaka kufikia wakati uwanja kufungiwa na TFF hivyo hawawezi kukubali.

“Nilisema kwa hali ilivyo muda wowote TFF wangeweza kuja kutufungia uwanja hivyo nitoe maelekezo kwa Kamati ya Siasa mkoa kaeni Mtafute Meneja mwengine ili changamoto hizo ziweze kuondoka”Alisema

Hata hivyo alisema kwamba kwa mpangaji Yule mwenye baa pale nje ambayo haijakidhi vigezo na Shirikisho la Soka nchini (TFF) walishasema ile baa inazuia washabiki kuingia uwanjani wakati wa mpira na inatakiwa kuondoka lakini mpaka leo haijaondoka.
“Maanake huyo mtu ana mapembe kiasi gani yeye ni mpangaji kwenye eneo letu lakini anakigomea CCM hivyo nahitaji hii baa leo iondoke ili maelekezo na maagizo ya TFF tuweze kuyatimiza na apatikane Meneja mwengine haraka ili aweze kushirikina na viongozi wa CCM kufungwa viti hivyo natoa mwezi mmoja”Alisema

Awali akizungumza aliyekuwa Meneja wa uwanja wa CCM Mkoa wa Tanga Akida Machai alisema changamoto ya uhaba wa nguvu kazi ndio imepelekea kukwamisha viti hivyo kufungwa .

Alisema kwamba walikuwa wakihitaji kuongezewa nguvu kazi yeye anashukru CCM kwa nafasi waliompatia na wanamtakia kilala heri Meneja Mpya huku akieleza wakati viti vilipokuja walipeleka Bajeti ya kufunga viti CCM na vitu vinavyohusika na hawezi kutoa fedha zake kufungwa viti.
Continue reading

Kajunason at 0

Beki kisiki wa klabu ya Young Africans S.C. na timu ya taifa ya Tanzania, Dickson Job, anaendelea kuuguza majeraha yaliyompata hivi karibuni na yanatarajiwa kumuweka nje ya uwanja kwa takribani miezi miwili.

Kwa mujibu wa Kocha Mkuu wa Yanga, Pedro Goncalves, beki huyo alipata majeraha ya kifundo cha mguu wakati wa mchezo wa dabi ya Kariakoo dhidi ya Simba S.C. uliochezwa mapema mwezi Machi 2026. Kutokana na majeraha hayo, Job alilazimika kutolewa uwanjani mapema na nafasi yake kuchukuliwa na beki mwingine.

Kocha huyo amesema majeraha hayo yatamfanya mchezaji huyo kukosekana katika michezo kadhaa ya Ligi Kuu Tanzania Bara huku akipatiwa matibabu na uangalizi wa karibu na madaktari wa klabu hiyo.

Dickson Job ambaye ni mmoja wa mabeki tegemeo wa Yanga na Taifa Stars, ameendelea kuwa mhimili muhimu katika safu ya ulinzi ya timu hiyo tangu alipojiunga akitokea Mtibwa Sugar F.C. mwaka 2021.

Kutokana na hali hiyo, benchi la ufundi la Yanga linatarajiwa kutumia mabeki wengine kuziba pengo lake hadi atakapopona na kurejea uwanjani.

Continue reading
Subscribe to: Posts (Atom)