Articles by "AJALI"
Showing posts with label AJALI. Show all posts

Kajunason at 0
Rais wa Jamhuri ya Muungano wa Tanzania Mhe. Dkt. Samia Suluhu Hassan akikagua eneo la maafa ya ajali ya kuporomoka kwa ghorofa Kariakoo, Wilaya ya Ilala Jijini Dar es Salaam tarehe 20 Novemba, 2024.Rais wa Jamhuri ya Muungano wa Tanzania Mhe. Dkt. Samia Suluhu Hassan akizungumza na wananchi mara baada ya kukagua eneo la maafa ya ajali ya kuporomoka kwa ghorofa Kariakoo, Wilaya ya Ilala Jijini Dar es Salaam tarehe 20 Novemba, 2024.
Rais wa Jamhuri ya Muungano wa Tanzania Mhe. Dkt. Samia Suluhu Hassan akiwajulia hali na kuwapa pole majeruhi wa ajali ya kuporomoka kwa ghorofa Kariakoo ambao wamelazwa katika Taasisi ya Tiba ya Mifupa Muhimbili (MOI), Ilala Jijini Dar es Salaam tarehe 20 Novemba, 2024.

Na Mwandishi Wetu.

Rais wa Jamhuri ya Muungano wa Tanzania, Dkt. Samia Suluhu Hassan, amefanya ziara katika eneo la Kariakoo, jijini Dar es Salaam, leo Novemba 20, 2024, mara baada ya kurejea kutoka Brazil. Ziara hiyo ililenga kukagua shughuli za uokoaji kufuatia ajali ya kuporomoka kwa jengo lililosababisha maafa makubwa.

Akizungumza na wananchi baada ya ukaguzi, Rais Samia alithibitisha kuwa watu 20 wamepoteza maisha kutokana na ajali hiyo.

“Jitihada kubwa katika tukio hili zililenga kuwaokoa wenzetu waliokuwa wamekwama ndani ya jengo hilo wakiwa hai, lakini jitihada hizi haziondoshi kudra ya Mungu. Pamoja na juhudi zilizofanywa, tumepoteza wenzetu, na hadi sasa idadi yao ni 20,” alisema Rais Samia.

Aidha, alieleza kuwa miili ya marehemu hao tayari imeshazikwa kwa ushirikiano wa familia na serikali.

Rais Samia alibainisha kuwa ajali hiyo ni pigo kubwa kwa taifa, kwa kupoteza nguvu kazi muhimu, na kwa familia zilizopoteza wapendwa wao.

Kwa lengo la kuzuia matukio kama haya siku zijazo, Rais Samia alisema akiwa nchini Brazil alimwagiza Waziri Mkuu kuunda tume ya watu 20 ili kufanya ukaguzi wa majengo yote katika eneo la Kariakoo.

“Naambiwa tume hiyo tayari imeundwa. Baada ya kukamilisha kazi yao, tutazingatia mapendekezo yao. Kama wataelekeza kwamba majengo yaliyo chini ya kiwango yabomolewe, hatutasita kuchukua hatua hiyo,” alisisitiza Rais Samia.

Mbali na vifo vilivyoripotiwa, idadi ya majeruhi wa tukio hilo bado inaendelea kufanyiwa tathmini. Timu za uokoaji, zikiwemo vikosi vya zimamoto, polisi, na wanajamii wa kujitolea, zimekuwa zikifanya kazi usiku na mchana kuhakikisha usalama wa manusura na kurejesha hali ya kawaida katika eneo hilo.

Wakazi wa Kariakoo na maeneo jirani wamehimizwa kushirikiana na serikali kwa kutoa taarifa zozote zitakazosaidia uchunguzi wa chanzo cha ajali hiyo.
Continue reading

Kajunason at 0
Naibu Katibu Mkuu (Mazingira) Ofisi ya Makamu wa Rais Bi. Christina Mndeme (katikati mbele) akiwasili mkoani Njombe kwa ajili ya kutoa elimu na uhamasishaji juu ya matumizi ya Nishati Safi ya Kupikia, Septemba 21,2024. Kushoto kwake ni Mkuu wa Wilaya ya Njombe Mhe. Kissa Kasongwa na kulia kwake ni Mkuu wa Wilaya ya Ludewa Mhe. Olivanus Thomas.
Naibu Katibu Mkuu (Mazingira) Ofisi ya Makamu wa Rais Bi. Christina Mndeme akivalishwa skafu na skauti mkoani Njombe mara baada ya kuwasili mkoani humo kwa ajili ya kutoa elimu na uhamasishaji juu ya matumizi ya Nishati Safi ya Kupikia, Septemba 21,2024.
Naibu Katibu Mkuu (Mazingira) Ofisi ya Makamu wa Rais Bi. Christina Mndeme akitoa elimu na uhamasishaji juu ya matumizi ya Nishati Safi ya Kupikia mkoani Njombe Septemba 21,2024 ambapo mikoa mingine iliyonufaika na elimu hiyo ni pamoja na Katavi, Rukwa, Songwe na Mbeya.
Kamishina kutoka Wizara ya Nishati Bw. Styden Rwebangira akitoa elimu na uhamasishaji juu ya matumizi ya Nishati Safi ya Kupikia mkoani Njombe, Septemba 21,2024.

Naibu Katibu Mkuu (Mazingira) Ofisi ya Makamu wa Rais Bi. Christina Mndeme amekamilisha ziara yake ya mkoa mitano ambayo alikuwa akitoa elimu pamoja na kuhamisha wananchi juu ya matumizi ya Nishati Safi ya Kupikia.

Akiwa mkoani Njombe Septemba 21, 2024 Bi. Mndeme amesema ziara hiyo imekuwa na mafanikio makubwa kutokana na mijadala, maswali na ushauri ambao wananchi walikuwa wakichangia kila siku baada ya uwasilishwaji wa maada mbalimbali.

Amesema baada ya kumaliza Katavi, Rukwa, Songwe, Mbeya na Njombe bado elimu itaendelea kutolewa sababu inahitajika zaidi ili kuhakikisha lengo la Serikali lililowekwa la kuhakikisha hadi mwaka 2034 asilimia 80 ya wananchi wawe wanatumia Nishati Safi ya Kupikia.

“Katika ziara hii tumegundua vitu vingi ikiwemo watu bado wanaamini Nishati Safi ni gharama kuitumia hasa taaasisi zile zinazolisha watu zaidi ya 100 wakihofia ufungaji wa mitambo.

“Hata hivyo hawaangalii athari zake ambazo zinatokana na matumizi ya nishati isiyokuwa salama, wengi wanaangalia unafuu wa upatikanaji wa nishati lakini hayo yote tumeyaona na yanafanyiwa kazi,” amesema Bi. Mndeme.

Kwa upande wake, Kamishina kutoka Wizara ya Nishati Bw. Styden Rwebangira ameeleza kuwa kila mmoja anapaswa kuliangalia jambo hili kwa kuijali afya yake na jamii inayomzunguka kwa kutumia Nishati Safi ya Kupikia.

Naye, Naibu katibu Mkuu Wizara ya Maendeleo ya Jamii, Jinsia, Wanawake na Makundi Maalumu Bi. Felista Mdemu amesema jamii imeanza kuelewa taratibu umuhimu wa kutumia Nishati Safi ya kupikia japo elimu inapaswa kutolewa zaidi.
Continue reading

Kajunason at 0
Tume ya Ushindani (FCC), imeendelea kutumia fursa ya Maonesho ya 48 ya Biashara ya Kimataifa (Sabasaba) kwa kutoa elimu kwa Umma ambao ndio walaji au watumiaji wa bidhaa na huduma.

Wananchi mbalimbali wameendelea kujitokeza na kutembelea banda la FCC ambapo wamenufaika kwa kupata elimu zaidi inayohusu masuala ya Ushindani, Udhibiti wa Bidhaa Bandia na Kumlinda Mlaji kutoka kwa wafanyakazi wa FCC.

Maonesho haya yaliyoanza tarehe 28 Juni na kufunguliwa rasmi tarehe 3 Julai, 2024 yanatarajiwa kuhitimishwa tarehe 13 Julai, 2024.









Continue reading

Kajunason at 0
Mwenyekiti wa Tume Huru ya Taifa ya Uchaguzi (INEC), Mhe. Jaji wa Mahakama ya Rufaa, Jacobs Mwambegele (wapili kulia) na Mjumbe wa Tume, Mhe. Dkt. Zakia Mohamed Abubakar wakishuhudia ufunguzi wa kituo cha kupigia kura No 1 katika Skuli ya Sebleni Jimbo la Kwahani Mkoa wa Mjini Mgaharibi leo tarehe 08 Juni,2024 ambapo wananchi wa jimbo hilo wanapiga kura katika uchaguzi mdogo wa jimbo hilo kumchagua Mbunge wao.
Wananchi wa jimbo la Kwahani wakihakiki majina yao kabla ya kwenda kupiga kura. 
Msimsmizi wa Kituo No. 1 Shehiya ya Sebleni kilichopo katika Skuli ya Sebleni akifunga sanduku la kura kabla ya kuzanza zoezi la Uchaguzi.  
Mpiga Kura akiandaliwa karatasi ya Kura tayari kwa Kupiga Kura 

Mkazi wa Shehiya ya Sebleni akipiga Kura leo Juni 8, 2024 kumchagua Mbunge wa Jimbo hilo. 

Wapiga Kura wakiwa katika mstari katika moja ya vituo vya Kupiga Kura Jimbo la Kwahani.
Na Mwandishi wetu, Zanzibar
Mwenyekiti wa Tume Huru ya Taifa ya Uchaguzi (INEC), Mhe. Jaji wa Mahakama ya Rufaa, Jacobs Mwambegele ameshuhudia wananchi wa Jimbo la Kwahani Mkoa wa Mjini Magharibi wakipiga kura katika uchaguzi mdogo wa jimbo hilo kumchagua Mbunge wao.
 
Jaji Mwambegele aliambatana na Mjumbe wa Tume hiyo, Mhe. Dkt. Zakia Mohamed Abubakar ambapo walitembelea vituo hivyo vya kupigia kura na kushuhudia ufunguaji wa vituo  saa moja kamili asubuhi.
 
Akizungumza baada ya kutembelea vituo vya kupigia kura katika Skuli ya Sebleni, Uwanja wa Negro na Kariakoo, Jaji Mwambegele alisema zoezi linakwenda vizuri na wao walishuhudia vituo vikifunguliwa kwa wakati na wananchi kupiga kura.
 
Aidha, amesema vyama vya siasa vimeweka mawakala wakutosha katika katika vituo vyote vya kupigia kura walivyotembelea.
 
“Tumeshuhudia ufunguzi wa vituo na upigaji kura, vituo vimefunguliwa kwa wakati na wananchi wamejitokeza kwa wingi kuja kutumia haki yao ya kupiga kura pia vyama vya siasa vimeweka mawakala wakutosha katika vituo hivyo,”alisema Jaji Mwambegele.
 
Jaji Mwambegele amesema wananchi wa Jimbo la Kwahani wameonesha mwitikio mkubwa kwa kujitokeza kwa wingi kupiga kura na kuchagua kiongozi wanayemtaka.
 
Vyama 14 vimesimamisha wagombea katika Uchaguzi huo mdogo wa kiti cha Ubunge jimbo la Kwahani ambapo majina yao na vyama katika Mabano ni Bw.  Bashir Yatabu Said (Demokrasia Makaini), Bi. Nuru Abdulla Shamte (DP), Bi. Mwanakombo Hamad Hassan (NLD), Bi. Zainab Maulid Abdallah (CCK), Bi. Tatu Omary Mungi (UPDP), Bw. Khamis Yussuuf Mussa (CCM) na Bi. Jarade Ased Khamis (AAFP).
 
Wengine ni  Bw. Kombo Ali Juma (NRA), Bi. Shara Amran Khamis (ADC), Bi. Naima Salum Hamad (UDP), Bi. Madina Mwalim Hamad (ADA TADEA), Bw. Amour Haji Ali (SAU), Bi. Mashavu Alawi Haji (UMD) na Bw. Abdi Khamis Ramadhan (CUF).
Mwenyekiti wa Tume Huru ya Taifa ya Uchaguzi (INEC), Mhe. Jaji wa Mahakama ya Rufaa, Jacobs Mwambegele akisalimia mawakala wa vyama waliokua katika Kituo cha Kupigia Kura.
Mwenyekiti wa Tume Huru ya Taifa ya Uchaguzi (INEC), Mhe. Jaji wa Mahakama ya Rufaa, Jacobs Mwambegele na Mjumbe wa Tume, Mhe. Dkt. Zakia Mohamed Abubakar wakiangalia vituo vya wazi vya kupigia kura 
Mwenyekiti wa Tume Huru ya Taifa ya Uchaguzi (INEC), Mhe. Jaji wa Mahakama ya Rufaa, Jacobs Mwambegele akiangalia vituo vya wazi vya kupigia kura 
Karani Muongozaji akihakiki jina la Mpiga Kura kabla ya kumruhusu kwenda Kupiga Kura.
Waangalizi wa Uchaguzi wa Jimbo la Kwahani wakishuhudia wananchi wa Jimbo la Kwahani wakipiga Kura leo.
Continue reading

Kajunason at 0

Arusha 17 Mei 2024 - Rais wa Serikali ya Mapinduzi Zanzibar, Dkt. Hussein Ali Mwinyi ameipongeza Benki ya CRDB kwa kuendelea kutengeneza faida kubwa inayoiwezesha benki hiyo kutoa gawio kwa wanahisa wake kutokana na uwekezaji wao ndani ya benki hiyo.

Rais Mwinyi alitoa pongezi hizo wakati akifungua semina ya uwekezaji na elimu ya fedha iliyoandaliwa na benki hiyo kwa wanahisa wake na Watanzania kuelekea Mkutano Mkuu wa 29 wa Wanahisa utakaofanyika Jumamosi Mei 18, katika Kituo cha Kimataifa cha Mikutano cha Arusha (AICC).

“Nadhani sitakuwa nimekosea nikisema ongezeko la faida baada ya kodi ambayo Benki yetu ya CRDB imepata mwaka jana kufikia Sh bilioni 424 kulinganisha na Sh bilioni 351 mwaka 2022, ni ukuaji mkubwa wa faida kupata kutokea,” alisema Rais Mwinyi.

Alisema kuwa Benki ya CRDB imeendelea kudhihirisha kivitendo kuwa “Benki kiongozi” nchini kwani kila mwaka imekuwa ikiendelea kutoa faida ya uwekezaji kwa wanahisa wake huku akizitaka taasisi nyengine za umma na binafsi kuiga mfano.

“Nimefurahishwa pia kusikia mwaka huu Bodi ya Wakurugenzi imekuja na pendekezo la ongezeko la asilimia 11 ya gawio kwa hisa. Wanahisa wa Benki ya CRDB mnastahili kutembea kifua mbele kwa ongezeko hili,” aliongezea Rais Mwinyi.
Rais Mwinyi pia aliipongeza Benki ya CRDB kwa kuandaa semina ya elimu ya fedha na uwekezaji kwa ajili ya wanahisa wake na Watanzania huku akibainisha kuwa umahiri wa masuala ya fedha wa wananchi ni moja ya msingi muhimu wa maendeleo ya watu wa taifa lolote duniani.

“Niwapongeze Benki ya CRDB kwa kuongoza katika utoaji wa elimu ya masuala ya fedha kwa Watanzania. Siku chache zilizopita, mliandaa semina mliyoiita CRDB Bank Uwekezaji Day, mimi niliifuatilia kupitia televisheni,” Rais Mwinyi alisema huku akiitaka benki hiyo kuendelea kutoa elimu kwa wananchi ili kuongeza ujumuishi wa kifedha.

Katika hotuba yake, Rais Mwinyi pia alisisitiza umuhimu wa sekta ya fedha katika maendeleo ya taifa, akitambua mchango mkubwa wa Benki ya CRDB katika kuimarisha uchumi wa Tanzania, bara na Zanzibar. Alieleza jinsi Benki ya CRDB imekuwa mshirika muhimu katika kuendeleza dhana ya Uchumi wa Buluu, kupitia programu kama vile 'INUKA na Uchumi wa Buluu', ambazo zimechangia sana katika sekta za utalii, kilimo, ufugaji, uvuvi, mafuta, biashara, na ujasiriamali.

Kwa upande wake Mwenyekiti wa Bodi ya Wakurugenzi Benki ya CRDB, Dkt. Ally Laay alisema benki hiyo ikiwa benki ya kizalendo inayomilikiwa na Watanzania kwa zaidi ya asilimia 80, inajivunia kuendelea kukuza thamani ya uwekezaji wa wanahisa wake ikiwamo Serikali ambayo inamiliki asilimia 36 ya hisa katika benki hiyo.

Serikali ya Mapinduzi Zanzibar ni mwanahisa wa Benki hiyo kupitia Mfuko wa Hifadhi ya Jamii wa Zanzibar (ZSSF). Dkt. Laay amewakaribisha Watanzania wengine kuwekeza ndani ya Benki ya CRDB ili nawao waanze kunufaika na gawio nono ambalo limekuwa likitolewa na Benki hiyo.

Naye Mkurugenzi Mtendaji wa Benki hiyo, Abdulmajid Nsekela alisema malengo ya semina hiyo ni kuwajengea uwezo Wanahisa wao pamoja na Watanzania wengine ili kuwajengea uwajibikaji wa kifedha na kuongeza ushiriki katika fursa za uwekezaji hususan katika soko la hisa la Da es Salaam.

“Kwa kutoa elimu hii Wanahisa wetu pia wanapata kufahamu zaidi faida za kuwekeza katika Benki yao ya CRDB, hivyo basi kuongeza uwekezaji na kupata faida nono zaidi, lakini pia kuwahamasisha na Watanzania wengine pia kuwekeza katika hisa hususan za Benki ya CRDB na kuanza kupata gawio,” aliongezea Nsekela.

Aidha, Nsekela alimshukuru Rais Mwinyi kwa ushirikiano wa kimkakati na mazingira mazuri ya biashara ambayo ndio chachu ya utendaji mzuri wa benki hiyo. Kadhalika, alimhakikishia Mheshimiwa Rais kuwa Benki ya CRDB itaendelea kuwezesha uchumi wa Zanzibar kwa kufadhili miradi mbalimbali ya maendeleo hususan katika kuwawezesha wananchi kunufaika na fursa za Uchumi wa Buluu.

Katika semina hiyo, mada mbalimbali zilijadiliwa, ikiwa ni pamoja na Ujumuishi wa Kifedha, Uwekezaji katika Hisa, Hatifungani ya Kijani ya Benki ya CRDB, Wosia na Mirathi, pamoja na Kinga dhidi ya Majanga.

Semina ya Wanahisa iliyofanyika leo ni sehemu ya maandalizi kuelekea Mkutano Mkuu wa 29 wa Benki ya CRDB utakaofanyika katika Kituo cha Kimataifa cha Mikutano (AICC) na kupitia Mtandao. Mkutano huo unatarajiwa kuaanza saa 3 asubuhi, ambapo watu wa mtandaoni wataweza kujiunga kupitia link https://escrowagm.com/crdb/login.aspx au kupitia SimBanking App.


Benki ya CRDB imeweka muongozo wa jinsi ya kushiriki mkutano mkuu kwa njia ya mtandao kupitia tovuti yake ya www.crdbbank.co.tz, mitandao yetu ya kijamii ya Instagram, twitter, lakini pia maelekezo yametumwa kwa ujumbe mfupi kwa Wanahisa.
Sehemu ya Wanahisa wakiwa katika Semina ya Wanahisa wa Benki ya CRDB ambayo imefanyika leo katika Ukumbi wa Mikutano wa Kimataifa wa Arusha (AICC) kuelekea Mkutano Mkuu wa Benki hiyo utakaofanyika hapo kesho.
Mkuu wa Mkoa wa Arusha, Paul Makonda akizungumza katika Semina ya Wanahisa wa Benki ya CRDB ambayo imefanyika leo katika Ukumbi wa Mikutano wa Kimataifa wa Arusha (AICC) kuelekea Mkutano Mkuu wa Benki hiyo utakaofanyika hapo kesho.
Waziri wa Fedha na Mipango wa Zanzibar, Saada Mkuya Semina ya Wanahisa wa Benki ya CRDB ambayo imefanyika leo katika Ukumbi wa Mikutano wa Kimataifa wa Arusha (AICC) kuelekea Mkutano Mkuu wa Benki hiyo utakaofanyika hapo kesho.















Continue reading
Subscribe to: Posts (Atom)