Rais Museveni aanza kusafisha Uongozi wa Uganda Airlines, amuondoa CEO

Rais wa Yoweri Museveni ameagiza Mkurugenzi Mtendaji wa Uganda Airlines, Jenifer Bamuturaki, kujiweka pembeni mara moja huku serikali ikiendesha mageuzi makubwa ya uongozi na uendeshaji wa shirika hilo la ndege.

Kupitia barua ya Februari 13, 2026 kwa Waziri wa Uchukuzi na Ujenzi, Katumba Wamala, Museveni alimteua mtaalamu wa anga kutoka Ethiopia, Girma Wake, kuwa Kaimu Mkurugenzi Mtendaji hadi CEO mpya atakapopatikana ifikapo Julai mwaka huu. Hatua hiyo inalenga kulirejesha shirika hilo katika misingi imara ya usimamizi na ufanisi wa kibiashara.

Akizungumza kuhusu uamuzi huo, Waziri wa Nchi anayesimamia masuala ya uchukuzi, Fred Byamukama, alisema kuwa matatizo ya uongozi yalichangia shirika hilo kufungua njia nyingi za safari zisizoendana na ukubwa wa ndege zilizopo, hali iliyosababisha hasara na kudumaa kwa ukuaji wa kampuni. Aliongeza kuwa kulikuwa pia na tuhuma za rushwa na matumizi mabaya ya rasilimali ndani ya shirika hilo.

Byamukama alisema kuwa serikali imeanza mchakato wa “kusafisha” shirika hilo, akionya kuwa watendaji wengine wanaweza kuondolewa au kuchukuliwa hatua za kinidhamu. “Hatuwezi kuendelea na watu wasiowajibika wakati serikali imetenga bajeti ya ziada ya shilingi bilioni 446 kununua ndege mpya na kuimarisha shirika,” alisema.

Taarifa hizo zinaonyesha kuwa serikali ya Uganda sasa inalenga kuboresha usimamizi, kuongeza uwajibikaji na kuhakikisha uwekezaji mkubwa unaofanywa katika sekta ya anga unaleta matokeo chanya kwa uchumi wa taifa. Mageuzi hayo yanatazamiwa pia kuimarisha ushindani wa Uganda Airlines katika soko la usafiri wa anga la kikanda na kimataifa.