Beijing, Septemba 26, 2025: Rais wa China, Xi Jinping, ametuma salamu za pongezi kwa Rais mteule wa Malawi, Profesa Arthur Peter Mutharika, kufuatia ushindi wake katika uchaguzi wa urais wa nchi hiyo.
Katika ujumbe wake, Rais Xi alisema China na Malawi ni marafiki wa kweli na washirika wa karibu waliounganishwa na uaminifu, urafiki na msaada wa pande zote. Alimpongeza Rais mteule Mutharika kwa mchango wake mkubwa katika kuanzisha uhusiano wa kidiplomasia kati ya China na Malawi mwaka 2007.
Tangu wakati huo, alisema Rais Xi, uhusiano kati ya nchi hizo mbili umekuwa ukikua kwa kasi na kwa uthabiti, ukidhihirishwa na kuimarika kwa uaminifu wa kisiasa na matokeo chanya katika sekta mbalimbali za ushirikiano wa kivitendo.
Aidha, alibainisha kuwa China na Malawi zimekuwa zikisaidiana katika masuala yanayohusu masilahi ya msingi ya kila nchi na masuala makuu ya kimataifa, jambo linaloendeleza urafiki wa kudumu kati ya mataifa hayo mawili.
Rais Xi alisisitiza utayari wake wa kushirikiana na Rais mteule Mutharika kuendeleza zaidi ushirikiano wenye manufaa ya pande zote na kukuza uhusiano wa kimkakati wa China na Malawi kwa manufaa ya wananchi wa mataifa hayo mawili.
Profesa Mutharika, ambaye alihudumu kama Rais wa Malawi kuanzia mwaka 2014 hadi 2020, sasa anarudi tena madarakani baada ya ushindi wake katika uchaguzi wa hivi karibuni.
Toa Maoni Yako:
0 comments: