Job Ndugai afariki Dunia Leo Agosti 6, 2025

Na Mwandishi Wetu, Dodoma.

Aliyekuwa Spika wa Bunge la Jamhuri ya Muungano wa Tanzania na Mbunge wa Kongwa, Job Yustino Ndugai, amefariki dunia leo Agosti 6, 2025, akiwa anapatiwa matibabu katika hospitali jijini Dodoma, baada ya kuugua ghafla.

Taarifa ya kifo hicho imetolewa na Spika wa Bunge, Dkt. Tulia Ackson, aliyesema kuwa Taifa limepoteza kiongozi mahiri, mzalendo na mzalishaji wa hoja zenye mwelekeo wa kuimarisha taasisi ya Bunge na maendeleo ya wananchi.

“Kwa masikitiko makubwa, naomba kutoa taarifa ya kifo cha kiongozi wetu, mwanasiasa mkongwe na Spika mstaafu wa Bunge, Job Ndugai, kilichotokea leo jijini Dodoma. Natoa pole kwa familia ya marehemu, ndugu, jamaa na wananchi wa Jimbo la Kongwa,” amesema Dkt. Tulia.

Ameongeza kuwa Ofisi ya Bunge kwa kushirikiana na kamati ya mazishi pamoja na familia ya marehemu, inaendelea kuratibu mipango ya mazishi, na taarifa zaidi zitatolewa.

Wasifu Mfupi wa Job Ndugai

Job Yustino Ndugai alizaliwa 15 Januari 1963. Alikuwa mwalimu kwa taaluma kabla ya kuingia rasmi kwenye siasa mwaka 2000, aliposhinda kwa mara ya kwanza nafasi ya Ubunge wa Jimbo la Kongwa, Mkoa wa Dodoma, kupitia Chama Cha Mapinduzi (CCM). Tangu wakati huo, alichaguliwa tena katika chaguzi zote zilizofuata hadi kifo chake.

Mwaka 2010, Ndugai aliteuliwa kuwa Naibu Spika wa Bunge, nafasi aliyohudumu hadi 2015 alipoteuliwa na kuchaguliwa kuwa Spika wa Bunge la 11, kufuatia kustaafu kwa mtangulizi wake Anne Makinda. Alirejea tena kama Spika wa Bunge la 12 mnamo Novemba 2020.

Mnamo Januari 6, 2022, Ndugai alijiuzulu nafasi ya Spika kufuatia mjadala mpana wa kitaifa kuhusu deni la Taifa, lakini aliendelea kuhudumu kama Mbunge wa Kongwa hadi mauti yalipomfika.

Katika maisha yake ya kisiasa, Ndugai alikuwa anajulikana kwa msimamo wake thabiti, weledi wa kanuni za Bunge na sauti yake isiyosita kupaza hoja zenye kugusa maslahi ya Taifa. Alikuwa na kauli maarufu ya "Bunge siyo sehemu ya kudharau Serikali, bali ya kuisimamia kwa ufanisi."

Mwaka huu 2025, Ndugai alikuwa ameonesha nia ya kuendelea kuhudumu kama Mbunge wa Kongwa kwa kuchukua fomu ya kugombea tena kupitia CCM, na tayari alikuwa ameshinda kura za maoni ndani ya chama hicho.