MAKAMU WA RAIS AZINDUA KONGAMANO LA 7 LA AFYA NA SAYANSI AFRIKA MASHARIKI

Makamu wa Rais wa Jamhuri ya Muungano wa Tanzania Mhe. Samia Suluhu Hassan akihutubia wakati wa ufunguzi wa Kongamano la 7 la Afya na Sayansi la Afrika Mashariki lililofanyika katika Kituo cha Kimataifa cha Mikutano cha Mwalimu Julius Nyerere jijini Dar es Salaam. (Picha na Ofisi ya Makamu wa Rais)

Makamu wa Rais wa Jamhuri ya Muungano wa Tanzania Mhe. Samia Suluhu Hassan akiwasha mwenge kama ishara ya ufunguzi wa Kongamano la 7 la Afya na Sayansi la Afrika Mashariki lililofanyika katika Kituo cha Kimataifa cha Mikutano cha Mwalimu Julius Nyerere jijini Dar es Salaam. (Picha na Ofisi ya Makamu wa Rais)

Sehemu ya Wataalamu waliohudhuria ufunguzi wa Kongamano la 7 la Afya na Sayansi la Afrika Mashariki lililofanyika katika Kituo cha Kimataifa cha Mikutano cha Mwalimu Julius Nyerere jijini Dar es Salaam. (Picha na Ofisi ya Makamu wa Rais).

SAMIA- Tunahitaji Kufanya Mambo Makubwa Sekta ya Afya EAC

Na Paschal Dotto-MAELEZO.

Makamu wa Rais wa Jamhuri ya Muungano wa Tanzania, Samia Suluhu Hassan amefungua mkutano wa Teknolojia na Utafiti wa Sayansi ya Afya kwa nchini wanachama wa Jumuiya ya Afrika ya Mashariki na Kuzindua Mifumo na teknoljia ya kidijitali itakayotumika kutoa huduma za Afya kwa nchi wanachama leo jijini, Dar es Salaam.

Akizungumza katika Hafla hiyo ya ufunguzi, Mama Suluhu amesema mifumo hiyo mitatu ambayo ni Digital REACH Initiative Strategic Plan 2019-2028, The East Africa Web Portal for Heath Informations na YEARS Forum itachochea utaoaji wa huduma za afya kwa wanachi wa Afrika Mashariki.

“Mkutano wetu leo umekusanyisha wadau wote wa sekta ya afya Afrika Mashariki, lakini pia wataalam wengine kutoka kwengineko duniani, na dhumuni ni kuweza kuangalia matumizi ya teknolojia katika kuboresha na kutatua changamoto za huduma za afya kidijitali zaidi”, alisema Makamu wa Rais.

Aidha, Mama Suluhu alisema kuwa mkutano utatoa fursa kwa nchi wanachama wa Jumuiya hiyo kubadilishana mawazo ili kuweza kuipanua kwa kasi sekta ya afya katika ukanda wa Afrika Masharikia, kwa kuwa uchumi wa sasa ni uchumi wa kati, unaohitaji watu wenye afya bora katika kufanya kazi, kwa hiyo kunahitajika kuwepo na huduma za afya za uhakika na kwa haraka zaidi kwa kutumia teknolojia ya kisasa zaidi.

Naye Waziri wa Afya, Maendeleo ya Jamii, Jinsia, Wazee na Watoto, Ummy Mwalimu alisema kuwa Mkutano huu wa siku tatu unajumuisha wanasayansi watafiti na watoa huduma za afya kutoka EAC na nje, ambao watatoa tafiti na Mada za tafiti za kina, ambazo zitawapa Mawaziri fursa ya kupata uzoefu katika kuboresha sera na kuja na maamuzi katika kuboresha huduma za afya.

“Rwanda wanatumia ndege isiyo na rubani katika kusambaza dawa, chanjo na damu katika kukabiliana na vifo vya mama wajawazito katika maeneo ya vijijini, kadhalika badala ya kutumia makaratasi katika hospitali, na kwa vile wananchi wengi wana simu, tumeanza kuhakikisha tunatumia teknolojia katika utoaji wa huduma za afya ili kukabiliana na changamoto, ikiwemo ya kupotea kwa mafaili na kupata taarifa za msaada wa huduma za afya kutoka hospitali moja hadi nyingine nchni”, alisema Waziri wa Afya.

Waziri Ummy alisema kuwa katika mkutano huo, Tanzania watapata maarifa katika matumizi ya teknoljia na kuongeza uhakika wa matumizi hayo, alitoa mfano wa Hospitali ya Taifa Muhimbili kuwa tangu waanze kutumia teknolojia katika kuhifadhi taarifa, kupotea kwa mafaili kumepungua kwa asilimia 40-60, baada ya kuwaasa watoa huduma kutumia teknolojia.

“Tutaendelea kuhimiza watoa huduma watumie zaidi teknolojia mbalimbali katika kuboresha utoaji wa huduma za afya, madaktari bingwa wa masuala ya uzazi kwa wanawake wameanzisha mtandao wa WhatsApp ambapo iwapo kunachangamoto katika utoaji wao wa huduma, basi wanawasiliana na kupeana msaada/ushauri na hii imeweza kutusaidia ndani ya miezi mitatu, kwani imeokoa vifo sita tangu ianzishwe”, Waziri wa Afya, Ummy Mwalimu.