SIMBA YAIPIGA ZANZIBAR OCEAN VIEW 1-0

Katika mchezo wa kwanza mabingwa wa Eritrea Red Sea wameshuka uwanjani kuumana na Etincelles ya Rwanda katika mchezo ulioanza majira ya saa 8 mchana kwenye uwanja wa taifa jijini Dar es salaam. Matokeo ya mchezo huo Red Sea imeivurumisha Etincelles ya Rwanda kwa jumla ya mabao 4 kwa 1.

Patashika nyingine ilikua saa 10 jioni ambapo wekundu wa Msimbazi Simba Sports Club walijitupa tena uwanjani kutupa karata yao ya pili kwa kuvaana na Zanzibar Ocean View.

Katika mchezo huo Mnyama Simba leo ameunguruma kwenye uwanja wa taifa baada ya kuibuka na ushindi wa bao 1 kwa 0 dhidi ya Zanzibar Ocean View.Michuano hiyo itaendelea tena kesho ambapo jumla ya michezo 4 itapigwa katika mwendelezo wa mashindano hayo yakiwa yanafanyika jijini Dar es salaam pamoja na mkoani Morogoro.

Jijini Dar es salaam saa 8 mchana mabingwa wa Uganda Bunamwaya FC watashuka uwanjani kuumana na El- Merreikh ya Sudan na kisha kufuatiwa na mchezo baina ya Dar es salaam Young Africans dhidi ya Elman ya Somalia.

Na kule mkoani Morogoro kwenye uwanja wa Jamhuri pia itapigwa michezo miwili ,mchezo wa kwanza ukianza saa 8 mchana ambapo Ulinzi ya Kenya itaumana na Ports ya Djibout na saa 10 jioni St. George itashuka uwanjani kuumana na APR ya Rwanda.