TPDC KUONGEZA VITUO VYA KUJAZA GESI ASILIA KATIKA MAGARI

Mkurugenzi mtendaji wa Shirika la Maendeleo ya Petroli nchini ( TPDC), Kapuulya Musomba, (wa kwanza kulia) akieleza jambo. (picha na Mwamvua Mwinyi).

SHIRIKA la Maendeleo ya Petroli nchini ( TPDC), linatarajia kuongeza vituo 10 hadi 20 kwa Dar es salaam -Mtwara -Lindi, vya kujaza gesi asilia kwenye magari yaliyowekewa mfumo huo ambapo kipo kituo kimoja Ubungo ,kwa miaka kumi sasa ambacho hakikidhi mahitaji.

Ili kufikia malengo yake ya kuongeza vituo vingi katika maeneo mbalimbali limejipanga kuruhusu na kukubaliana na watu binafsi wenye vituo vya mafuta kuweka gesi kwenye vituo vyao .

Akitembelea maonyesho ya bidhaa za viwandani yanayoendelea viwanja vya sabasaba, Pichandege Kibaha Pwani, Mkurugenzi mtendaji wa Shirika la Maendeleo ya Petroli nchini ( TPDC), Kapuulya Musomba, alisema mwamko wa watumiaji upo vizuri tatizo hakuna vituo mikoani.

Alieleza mwaka ujao wa fedha wataongeza vituo hivyo na sasa wapo kwenye hatua ya manunuzi. Musomba alisema ,wataanza kuongeza vituo viwili ama vitatu Dar es salaam na kuendelea maeneo mengine, na kusema watatangaza tenda ili wawekezaji na watu binafsi wajitokeze kufanikisha hilo.

"Gesi asilia ikitumika kwenye magari inaweza kupunguza zaidi ya nusu ya gharama mafuta na kuleta unafuu katika sekta ya usafirishaji nchini,Hata hivyo alitaja mpango mwingine ni kuwafikia wananchi 120,000 ambao watafaidika na raslimali ya gesi lakini wanakwenda kwa awamu kulingana na fedha wanayoipata.

"Gesi kwa ajili ya majumbani tumeanza Dar es salaam na Mtwara, na kuhusu viwandani tumeshaanza Pwani, Dar es salaam na Mtwara kwa njia ya mabomba "Musomba alielezea,mwaka huu wa fedha kufikia 2019 watapeleka Kibaha kwa mitungi kwa kuwa mabomba hayajafika kwa kujazia Dar es salaam kisha kuwafikishia wananchi.

Alifafanua kwa wale wa mikoa mingine wameshaanza utafiti wa kina kuona kama watoa bomba Dar es salaam, Kibaha, Bagamoyo, Chalinze, Tanga litembee kwenye mikoa kama nane na kwa kushirikiana na wadau watafikia lengo hilo. Nae Mkuu wa mkoa wa Pwani ,mhandisi Evarist Ndikilo alisema ,wakati ujenzi wa bandari mpya Bagamoyo ukianza watahitaji gesi kutokana na ujenzi kuambatana na viwanda vingi.

Ndikilo alibainisha awamu ya kwanza ya ujenzi huo utaendana na ujenzi wa viwanda 190 ambapo awamu ya pili utakuwa na takriban viwanda 1,000 hivyo gesi itahitajika pia.