BULGARIA YAONESHA KUUNGA MKONO TAIFA HURU LA PALESTINA.

WAZIRI wa Mambo ya Nje wa Bulgaria, Nikolay Mladenov amethibitisha kuwa nchi yake iko tayari kuunga mkono juhudi za Palestina kuwa na taifa lake huru.

Mladenov alikutana na balozi wa Palestina nchini humo Bwana Ahmed al-Mathbouh, jana katika jitihada za nchi hiyo kukutana mabalozi wa nchi za kiislamu.

Bwana Al-Mathbouh alimfahamisha Bwana Mladenov juu ya hatua ambayo imefikiwa juu ya suala la Palestina na mazungumzo yaliyokwama ya kutafuta suluhu ya mgogoro huo kutokana na kiburi cha Israeli kukataa kuacha ujenzi mpya wa makazi katika ardhi inayo kaliwa na pia kamatakamata yake ya maelfu ya wananchi wa Palestina.

Alimweleza juhudi za viongozi wa Palestina za kufufua mazungumzo hayo na nia yao ya kulipeleka suala hilo kwenye Umoja wa Mataifa ili liweze kuungwa kwake mkono kwa uanzishaji wa taifa huru la Palestina.