Na Mwandishi Wetu, Dar es Salaam
Katika kuelekea maadhimisho ya Siku ya Kimataifa ya Haki za Mlaji Duniani, Fair Competition Commission (FCC) imetangaza mkakati wa kuendelea kutoa elimu kwa umma ili kuhakikisha walaji wanapata bidhaa na huduma salama zinazokidhi viwango vinavyotakiwa.
Akizungumza Machi 3, 2026 jijini Dar es Salaam, Kaimu Mkurugenzi Mkuu wa FCC, Khadija Ngasongwa, amesema tume hiyo itaendelea kuchukua hatua madhubuti kulinda maslahi ya walaji pamoja na kuimarisha ushindani wa haki sokoni.
Kwa mujibu wa Ngasongwa, Siku ya Mlaji huadhimishwa kila mwaka Machi 15, huku kilele cha maadhimisho hayo kitaifa kikiwa Machi 31. Mwaka huu maadhimisho yanaongozwa na kaulimbiu isemayo: “Bidhaa Salama, Imani kwa Mlaji.”
Amesema kaulimbiu hiyo inalenga kusisitiza umuhimu wa kuhakikisha bidhaa na huduma zinazotolewa sokoni ni salama, zinakidhi viwango vya kitaifa na kimataifa, na hazihatarishi afya, usalama wala maslahi ya mlaji.
Ngasongwa ameeleza kuwa maadhimisho hayo ni fursa muhimu ya kujenga imani ya walaji katika soko kwa kuimarisha uwazi, ubora na uwajibikaji miongoni mwa wafanyabiashara. Amebainisha kuwa mlaji anayezingatia ubora huchangia ukuaji wa uchumi imara, huku wafanyabiashara wanaozalisha na kusambaza bidhaa bora wakinufaika na mazingira ya ushindani wa haki yanayochochea ubunifu na ufanisi.
Katika kuadhimisha siku hiyo, FCC imepanga kutoa elimu kwa wadau mbalimbali wakiwemo wafanyabiashara, wazalishaji na watumiaji, ili kuongeza uelewa wa masuala ya ushindani na ulinzi wa mlaji. Lengo ni kuhakikisha wananchi wanafahamu haki zao na wanapata bidhaa pamoja na huduma zilizo bora na salama.
Kwa ujumla, FCC imetoa wito kwa wazalishaji, wasambazaji na watumiaji kushirikiana katika kujenga soko lenye ushindani wa haki na linaloweka mbele maslahi ya mlaji, kama msingi wa kukuza uchumi wa Taifa.
Kaimu Mkurugenzi Mkuu wa Tume ya Ushindani (FCC), Khadija Ngasongwa, akizungumza na waandishi wa habari wakati akitangaza maadhimisho ya Siku ya Mlaji Duniani leo tarehe 3 Machi 2026 jijini Dar es Salaam.
Mkuu wa Kitengo cha Mawasiliano Serikali wa FCC, Bi. Roberta Feruzi,
akitoa maelezo wakati akimkaribisha Kaimu Mkurugenzi Mkuu wa FCC, tarehe 3 Machi 2026, jijini Dar es Salaam.
Baadhi ya Watumishi wa FCC katika Mkutano na Waandishi wa Habari katika Mkutano wa Kaimu Mkurugenzi Mkuu wa FCC.
Baadhi ya Waandishi wa Habari wakifatilia Mkutano wa Kaimu Mkurugenzi Mkuu wa FCC jijini Dar wa Dar es Salaam.
Toa Maoni Yako:
0 comments: