Mfalme wa Rhymes Kuchukua Mke — Harusi Yafanyika Morogoro

Morogoro, Jumamosi, 6 Desemba 2025 — Msanii nguli wa muziki wa Bongo Flava, Afande Sele, anatarajiwa kuandika historia mpya leo baada ya kuamua kuingia rasmi katika maisha ya ndoa na mchumba wake, mwandishi wa habari Imani Makongoro.

Kwa mujibu wa taarifa iliyotolewa na Katibu wa Kamati ya Harusi, ndoa hiyo imepangwa kufungwa katika eneo la Nguzo Camp jijini Morogoro, kabla ya wageni kuelekea kwenye tafrija itakayofanyika katika ukumbi wa Hotel ya Morena.

Sherehe hiyo inatarajiwa kuhudhuriwa na ndugu, jamaa, marafiki pamoja na wadau mbalimbali wa muziki na vyombo vya habari.

Afande Sele, ambaye anatambulikana na wengi kama “Mfalme wa Rhymes Tanzania”, amekuwa mmoja wa wasanii wenye mchango mkubwa katika muziki wa hip hop nchini, huku mchumba wake Imani Makongoro akiwa miongoni mwa waandishi chipukizi wenye taswira pana katika uandishi wa habari.