MAPACHA WATATU KUWASHA MOTO NA DULLY SYKES MZALENDO PUB MEI 29.

BENDI ya muziki wa dansi hapa nchini, Mapacha Watatu linaloundwa na Kalala Jr, Khalid Chokoraa na Jose Mara wakishisindikizwa na mwanamuziki wa bongo flava Dully Sykes linatarajia kuzindua DVD yao ya ‘Jasho la Mtu’ kesho Jumapili, katika Ukumbi wa Mzalendo Pub, Kijitonyama.

Uzinduzi huo unasubiriwa kwa hamu na mashabiki wa bendi hiyo inayofanya vyema katika tasnia ya muziki wa dansi hapa nchini.

Akizungumza jana jijini Dar es Salaam, Meneja wa bendi hiyo, Hamis Dakota, alisema kwamba kila kitu kinakwenda sawa kwa bendi yao kuzindua DVD hiyo yenye uzito wa kutosha.

Alisema DVD hiyo wameiandaa vizuri ili mashabiki na wadau wao waikubali na kuzidi kuwaunga mkono katika harakati zao kimuziki.

“Nadhani wadau na mashabiki wetu watakubali kazi yetu, maana lengo ni kuhakikisha kwamba bendi inazidi kuwa juu kimuziki.

“Ni DVD yenye uzito wa kutosha, huku zile nyimbo zetu zote zinazofanya vyema, ukiwamo ule wa Shikwa Ushikwapo ukiwamo ndani,” alisema Dakota.

Mapacha Watatu inaundwa na Jose Mara, Khalid Chokoraa na Kalala Junior, miongoni mwa wanamuziki wanaokubalika kupita kiasi.