SIMANZI NA MAJONZI; WATOTO WATATU WAFARIKI DUNIA KATIKA BWAWA LA KUOGELEA JIJINI DAR

Na Saphina Joshua wa Kajunason Blog, Dar es Salaam. 

Simanzi na vilio jana vilitawala katika Mtaa wa Kijitonyama Mpakani A, baada ya watoto watatu wa familia jirani kufariki dunia baada ya kuzama katika bwawa la kuogelea walipokuwa wakisherehekea siku ya kuzaliwa mtoto mwenzao aliyetimiza mwaka mmoja.

Tukio hilo lilitokea juzi jioni katika Hoteli ya Landmark, Kunduchi Beach Dar es Salaam.

Waliofariki katika ajali hiyo ni Ndimbumi Sisala (9), mwanafunzi wa darasa la nne Shule ya Msingi Kijitonyama, Janeth Kihoko (9) wa darasa la nne Shule ya Msingi Dk Omar Ali Juma na Eva Mwakatobe (11) aliyekuwa darasa la tatu katika Shule ya Msingi Shekilango.

Kamanda wa Polisi Kanda Maalumu ya Dar es Salaam, Suleiman Kova alisema tukio hilo lilitokea juzi saa 11:00 jioni.