Mwili wa mama yake mzazi mwandishi wa ITV/Radio One, mama Anastazia Saro unatarajiwa kusafirishwa kwa ajili ya maziko yatakayofanyika Ijumaa huko Machame mkoani Kilimanjaro.
Akizungumza na Kajunason Blog jijini Dar ndugu wa marehemu ambaye hakutaka jina lake liandikwe mtandaoni alisema mpaka sasa wameshaanza kukusanya michango mbali mbali ambayo ndugu, jamaa na marafiki wamejitolea ili kufanikisha maziko hayo.
Alisema ndugu, jamaa na marafiki wameshutushwa na msiba huu wa ghafra ambao umetokana na mama yetu mpendwa kupigwa risasi na mkwe wake Mushi ambaye nae alijiua kwa kujipiga risasi.
"Unajua ndugu mwandishi mpaka sasa ratiba bado hatujaiweka vizuri kutokana na mambo mengi kuingiliana ila Mungu akipenda tunaweza kuaga Alhamis na baadae tusafirishe na Ijumaa tufanye maziko," alisema mmoja ya ndugu wa marehemu.
Ufoo alipigwa risasi na mzazi mwenzake, Anthery Mushi ambaye alijiua baadaye. Pia Mushi anatuhumiwa kumuua mama yake Ufoo, Anastazia Saro wakati wa tukio hilo.
Wakati huo mwili wa Antery Mushi unatarajiwa kusafirishwa na kuzikwa Kijiji cha Ongoma kilichopo katika Kata ya Uru, mkoani Kilimanjaro.
Hali ya mwandishi wa habari wa ITV/Radio One Ufoo Saro aliyejeruhiwa vibaya baada ya kupigwa risasi mbili juzi huko Kibamba, Dar es Salaam inazidi kuimarika na jana alizungumza na kusema; “Sijambo, naendelea vizuri.”
Ufoo, ambaye amelazwa katika Hospitali ya Taifa ya Muhimbili, hata hivyo, anazungumza kwa shida kutokana na kukabiliwa na maumivu baada ya kufanyiwa upasuaji juzi.
Mwandishi huyo amehamishiwa katika wodi ya upasuaji wa moyo huku kiongozi wa wodi hiyo, ambaye alikataa jina lake kuandikwa gazetini, akieleza kuwa walimhamishia huko ili apate muda zaidi wa kupumzika.
Toa Maoni Yako:
0 comments: