MAADHIMISHO YA JUBILEI YA MIAKA 50 YA UHURU WA TANZANIA BARA

Tarehe 31 Desemba, 2010, Rais wa Jamhuri ya Muungano wa Tanzania Mheshimiwa Dkt.  Jakaya Mrisho Kikwete katika salamu zake za mwaka mpya wa 2011 kwa Watanzania, kati ya masuala aliyozungumzia ni pamoja na kuliarifu Taifa kuhusu Maadhimisho ya miaka 50 ya Uhuru wa Tanzania Bara yatakayofanyika mwaka 2011 ambapo yatafanyika nchi nzima na kilele chake kuwa tarehe 9 Desemba, 2011.

 

Maadhimisho ya Miaka 50 ya Uhuru yalizinduliwa rasmi tarehe 1 Juni, 2011 Mjini Songea na Makamu wa Rais Mheshimiwa Dkt. Mohamed Gharib Bilal. Mambo mbalimbali yamefanyika hadi sasa na maandalizi yanaendelea ili kuhakikisha kwamba Maadhimisho hayo yanafanyika kwa ufanisi na uzito unaostahili.

 

(i)       Ratiba ya Maadhimisho kwa Wizara,  Mikoa na Sekta Binafsi:

Wizara, Mikoa na Sekta Binafsi zimefanya maonesho ya kuelezea mafanikio yaliyopatikana katika Nyanja mbalimbali katika kipindi cha Miaka 50 ya Uhuru kama ilivyopangwa.  Ratiba imekamilika jana tarehe 30 Novemba, 2011.

 

(ii)       Taarifa za Miaka 50 ya Uhuru za Wizara na Mikoa

Wizara/Mikoa imeandaa taarifa za Mafanikio ya Miaka 50 ya Uhuru.  Taarifa hizo pamoja na kutumiwa na Wizara/Mikoa wakati wa Maadhimisho ya ratiba zao, zimetumika pia katika kuandaa Taarifa Jumuishi ya Kitaifa. 

 

Taarifa hizo zimewekwa  kwenye Tovuti ya Taifa, Tovuti ya Ofisi ya Waziri Mkuu na Tovuti maalum iliyoanzishwa kwa ajili ya Maadhimisho haya.

 

(iii)      Taarifa Jumuishi ya Kitaifa ya Miaka 50 ya Uhuru

Taarifa Jumuishi ya Kitaifa ya Miaka 50 ya Uhuru imeandaliwa na kuchapishwa kwa Kiswahili na Kiingereza.  Taarifa hiyo watagawiwa Wananchi na Wadau wengine.

 

(iv)      Kutangaza Mafanikio Yaliyopatikana katika Vyombo vya Habari vya Ndani na Nje ya Nchi:

 

(a)         Vyombo vya Habari vya Nje ya Nchi

Makala zimeandaliwa na zitatolewa katika Vyombo vya Habari mbalimbali vya nje  na kusambazwa katika maeneo mbalimbali. Vyombo vya Habari vitakavyotumika ni pamoja na:

-  The New African Magazine (Uingereza);

                                    -   World Report (Gazeti la Independent la  Uingereza); na

  -   Asia Business Channel Television.

 

(b)   Vyombo vya Habari vya Ndani

Makala mbalimbali zimeandaliwa kuhusu Mafanikio yaliyopatikana katika Miaka 50 ya Uhuru.  Makala hizo zitatolewa kwenye vyombo vya habari vya ndani.    

 

(v)      Tovuti ya Maadhimisho ya Miaka 50 ya Uhuru

 Katika kufanikisha Maadhimisho haya na kuhakikisha taarifa   mbalimbali kuhusu Maadhimisho ya Miaka 50 ya Uhuru zinaufikia Umma, Tovuti maalum ya Maadhimisho ya Miaka 50 ya Uhuru imeanzishwa (www.tanzania50uhuru.go.tz).  

 

 Aidha, tovuti ya Taifa (www.tanzania.go.tz) na ya Ofisi ya Waziri Mkuu (www.pmo.go.tz) zinatumika pia katika kutoa habari za Maadhimisho haya.

 

 Ili kuhakikisha usahihi wa Taarifa zinazowekwa katika Tovuti ya Miaka 50 ya Uhuru kimeanzishwa kituo cha kutolea habari za Miaka 50 ya Uhuru katika Idara ya Habari (MAELEZO).

 

(vi)      Mialiko ya Viongozi kutoka Nje ya Nchi

Mhe. Rais amealika Viongozi kutoka Nje ya Nchi zikiwemo Nchi za SADC na Afrika Mashariki kujumuika nasi katika kusherehekea Miaka 50 ya Uhuru.  Tayari Ma-Rais wa Nchi Nane (8), Makamu wa Rais wa Nchi Tatu (3), Mawaziri Wakuu wa Nchi Tatu (3) pamoja na Viongozi Wawakilishi 16 wamethibitisha kuhudhuria Maadhimisho haya. 

 

(vii)      Mialiko ya Viongozi wa Ndani ya Nchi

Viongozi wa Kitaifa waliopo madarakani na Wastaafu, na wa Vyama vya Siasa (Wenyeviti na Makatibu Wakuu) wamepelekewa mialiko ya kuhudhuria Sherehe hizo na wengi wao wamethibitisha kuhudhuria Maadhimisho haya. 

 

(viii)      Mialiko Maalum ya Mhe.  Rais ya Viongozi wa Ndani ya Nchi

Mhe.  Rais ametoa mialiko maalum kwa Wajumbe wote wa Halmashauri Kuu ya Taifa, Wazee Mashuhuri kutoka Mikoa mbalimbali, baadhi ya Wenyeviti na Makatibu wa Chama Tawala kutoka Mikoa mbalimbali.

 

(ix)     Mbio za Mwenge wa Uhuru Mwaka 2011

Mbio za Mwenge wa Uhuru mwaka 2011 zimetumika pia kama sehemu ya Maadhimisho ya Miaka 50 ya Uhuru katika kuelezea mafanikio ya Serikali.  Mwenge uliwashwa rasmi na Makamu wa Rais, Mhe. Dkt.  Mohamed Gharib Bilal katika kijiji cha Butiama tarehe 14 Oktoba, 2011.

 

Ujumbe wa Mbio za Mwenge wa Uhuru mwaka huu ni “Miaka 50 ya Uhuru:  Tumethubutu, Tumeweza na Tunazidi Kusonga Mbele”.  Aidha, Mapambano dhidi ya Ugonjwa wa UKIMWI, Dawa za Kulevya na Rushwa ni sehemu ya Ujumbe huo.

 

Sherehe za kilele cha Mbio za Mwenge wa Uhuru zinafanyika leo tarehe 1 Desemba, 2011 huko Dar es Salaam.  Mgeni Rasmi katika Sherehe hiyo atakuwa Rais wa Jamhuri ya Muungano wa Tanzania Mheshimiwa Dkt. Jakaya Mrisho Kikwete ambaye atapokea Mwenge huo katika Uwanja wa Uhuru na kuwakabidhi Wanajeshi watakaoupandisha katika Mlima Kilimanjaro.

 

(x)        Wiki ya Maonesho ya Maadhimisho ya Miaka 50 ya Uhuru (Tarehe 1 - 12 Desemba, 2011)

 Kutakuwa na Wiki ya Maonesho ya Maadhimisho haya katika Viwanja vya Mwalimu J. K. Nyerere ambayo yameanza leo tarehe 1 - 12 Desemba, 2011.  Wizara na Mikoa, Sekta Binafsi na Wafanyabiashara mbalimbali wa Kimataifa na Ndani ya Nchi watashiriki katika Maonesho hayo ambayo hayatakuwa na kiingilio.  Maonesho hayo yatafunguliwa na Mheshimiwa Dkt. Ali Mohamed Shein, Rais wa Zanzibar na Mwenyekiti wa Baraza la Mapinduzi tarehe 2 Desemba, 2011 katika Viwanja vya Mwalimu J. K. Nyerere.

 

Utaratibu umewekwa kwa Viongozi wa Kitaifa waliopo Madarakani na Wastaafu wamealikwa kutembelea Maonesho haya.  Aidha, Mikoa yote itafanya Maonesho kama haya katika ngazi ya Mikoa na wageni rasmi watakuwa Wakuu wa Mikoa husika. Wananchi wanaombwa kujitokeza kwa wingi kwenye Maonesho hayo.

 

(xi)        Mkesha wa Uhuru Usiku wa Tarehe 8/12/2011

  Kutakuwa na Sherehe za Mkesha wa Uhuru katika Viwanja vya Mnazi Mmoja, Dar es Salaam usiku wa tarehe 8/12/2011 kuamkia tarehe 9/12/2011. Katika Sherehe za Mkesha huo Burudani mbalimbali zitakuwepo na shughuli kubwa itakuwa ni urushaji wa fashifashi (fireworks) ambazo zitarushwa Saa 6.01 usiku.

 

  Kutakuwa pia na shughuli za Mkesha usiku huo wa tarehe 8/9/2011 katika Manispaa zote za Dar es Salaam, ikiwemo Kinondoni (Viwanja vya Kawe) na Temeke (Viwanja vya Zakhem).  Shughuli kubwa usiku huo itakuwa ni Burudani na Urushaji wa Fashifashi.

 

(xii)       Maadhimisho ya Siku ya Kilele tarehe 9 Desemba, 2011

Sherehe za Kilele zitafanyika katika Uwanja wa Uhuru, Dar es Salaam tarehe 9/12/2011.  Mgeni rasmi katika Sherehe hizo atakuwa Rais wa Jamhuri ya Muungano wa Tanzania, Mheshimiwa Dkt. Jakaya Mrisho Kikwete.

 

Pamoja na shughuli mbalimbali zitakazofanyika siku hiyo kutakuwa na:

· Gwaride

Vikosi ya Ulinzi na Usalama kwa pamoja vimeandaa Gwaride la Miaka 50 ya Uhuru.  Kutakuwa na Onesho la Zana mbalimbali za Kivita.

 

·Halaiki

Imeandaliwa Halaiki ya Wanafunzi wa Shule za Msingi wapatao 4,550 na Wanafunzi wa Shule za Sekondari wa uhamasishaji wapatao 2,000.

 

·Ngoma za Asili

Kutakuwa na Vikundi vya Burudani kutoka Dar es Salaam vitakavyotumbuiza. Aidha, vimeandaliwa vikundi vinne kutoka Mikoa mitatu Nchini pamoja na Zanzibar ambavyo vitatumbuiza.  Vikundi hivyo ni:  

- Ngoma ya Ngongoti kutoka Mtwara;

- Ngoma ya Selo kutoka Pwani;

-   Ngoma ya Bugobogobo kutoka Mwanza;  na

-  Ngoma ya Msewe kutoka Zanzibar.

 

 Ninawaomba wananchi wote kwa ujumla waliopo Dar es Salaam na Mikoani kujitokeza kwa wingi kusherehekea Miaka 50 ya Uhuru wa Nchi yetu.

 

“Tumethubutu, Tumeweza, Tunazidi Kusonga Mbele”.

 

 

Mizengo P. Pinda (Mb.)

WAZIRI MKUU

 

01 Desemba 2011